El Zamboanga City Police Office (ZCPO) ya anuncia cay todo ya preparao y areglao para el seguridad durante el observacion del Semana Santa.
Asegun con Police Colonel Kimberly Molitas, el oficial-en-cargao del ZCPO, ya despelga sila 905 pulis para guardia con el observacion del Semana Santa.
Asegun con Molitas, el mga pulis despelgao areredor del ciudad que ya inclui na pantalan, aeropuerto, terminal de bus, vital instolaciones incluido mga lugar de adoracion y otro lugar onde mucho gente ta man hunto-hunto.
Si Molitas ya habla, ay despelga le 103 pulis na Monte de Abong-Abong na Barangay Pasonanca durante el Jueves y Viernes Santos hasta na dia de Domingo encuentro.
Asegun con Molitas, con el mga pulis na Monte de Abong-Abong ay suporta canila mga secreta del ZCPO y personajes milirar y mga personajes tambien de otro agencias que ta enforza ley.
Miles de mga devoto Catolico el ta visita na Monte de Abong-Abong para man via cruces na dia de Jueves hasta Viernes santo. Mayoriya de ila ta dorme na lugar al serar el noche de Jueves santo.
Asegun con Rodolfo Saavedra, Jr., el assistant city administrator, el City Security Unit ay despelga tamen con el de ila centro de mobil que tiene 37 camera y drones.
Asegun con Saavedra, aquellos quien quiere esta durante el noche de Jueves santos, alla canila pone na lugar del campo del mga Girl Scout.
Asegun con Saavedra, el estaciones de crus na Monte de Abong-Abong hay serra alas 12 del media noche hasta alas 3 del madrogada para dale tiempo to con mga fuersa de seguridad releva, man limpiesa y hace pa otro mga necesidades. (B. Garcia)
(Source: SunStar Zamboanga)