Cebu City – Gibuksan na ang usa ka dakong Arts and Crafts Expo sa Syudad sa Lapu-Lapu ug sa pribadong partner.
Sugod kagahapon, Abril 17 hangtud sa Abril 30, 2021, mahimo nang ma bisita ang “Mano Mano Arts and Crafts Expo sa Dakbayan.
Matod ni Lapu-Lapu City Mayor Junard Chan nga isip paghatag ug suporta sa local artist, nakig alayon ang Soltana Nature Residences ug Lapu-Lapu City Tourism Cultural and Historical Affairs Commission alang sa usa ka dakong event kabahin sa 500- Commemoration sa Victory at Mactan.
“Di ikalimod nga gibantog ang atong syudad nga maoy usa sa mga nangunang supplier sa mga furnitures ug handicraft sa lain-laing nasud. Pangworldwide ang atong talento ug aduna na kitay mga designers, artists ug painter nga naila na sa tibuok kalibutan,” pasigardo ni Mayor Chan.
Tuyo niini, matod sa mayor nga mas ipaila pa ang atong mga produkto nga ginama mismo sa mga Oponganon.
Gipasabot niini ang pulong nga ‘mano mano’ nagpasabot nga ginama kini gamit lamang ang mga kamot.
Dugang niya nga moagi sa kuti nga proseso pero high-class ang quality.
Gipaambit ni Chan ang iyang pinakapaborito mao ang thread painting nga miporma sa hulagway sa iyang pinalanggang asawa nga, si First Lady Cindi Chan.
Samtang ang labing nagustuhan ni FL Cindi mao ang bayong o classic Pinoy tote bag nga ginama sa rattan ug aduna pakini logo sa 500 years.
Gihulagway nga pulos maanindot ang anaa didto ug kung ikaw makahigayon sa pagsuroy sa maong expo, gusto nimong paliton ang tanan.
Giawhag sa mayor ang mga Oponganon nga bisitahon ang maong kalihukan sa Soltana Nature Residences ug gipaniguro niya nga mapabilib gyud ka sa mga maanindot nga mga arts and handicrafts.
(Jhon Tadlip/JTY)
(Source: Lapu-Lapu City Public Information Office, photo courtesy by Junard Chan)
