Cebu City – Gipaabot nga bisan unsang orasa pagasugdan ang feasibility study sa gitinguhang paghimo og tugpahanan sa lungsod sa Medellin, Cebu.
Gipahibawo kini sa kagamhanan sa Medellin human sa miting tali sa mga representante sa MCIAA o Mactan Cebu International Airport Authority.
Ang kadagkoan sa lungsod ug sa ilang katugbang sa MCIAA nagpahigayon usab og ocular inspection sa giplanohang luna sa Brgy. Caputatan Sur.
Suma pa nila, labing minos 32 ka ektaryang yuta ang gikinahanglan sa proyekto nga himoan sa runway ug ubang infrastructure nga gikinahanglan sa pag-accommodate sa gitawag og turboprop aircrafts.
Gisuwayan unta pagkuha sa media ang dugang detalye niini gikan kang Mayor Benjun Mondigo apan wa siya makontak.
Ang advisory sa lungsod nag-ingon nga gipaabot nga mopahigayon og feasibility study ang MCIAA ug mohatag og technical assistance sa LGU o local government unit alang sa katumanan sa proyekto.
Kada buwan magtagbo ang team aron paghatag og update sa giplanohang airport sa Medellin.
(Jhon Tadlip/ JTY, photo courtesy of Municipality of Medellin)
(Source: Medellin Public Information Office)