Look-out sa pagpatay sa 1 tag-iya sa beauty salon sa Gensan, nadakpan na sa PNP

General Santos City – Anaa na karon sa kustodiya sa General Santos City Police Office (GSCPO) ang usa sa mga suspek sa pagpusil-patay kang Renante Tampus, ang tag-iya sa usa ka beauty salon niadtong Miyerkules sa gabii sa Daproza ​​​​Street, Barangay Dadiangas West ning dakbayan sa Gensan.

Si Police Colonel Nicomedes Olaivar, hepe sa GSCPO, nikompirmar sa pagkasikop sa suspek nga giilang si alyas “Jack,” kinsa giingong nagsilbing look-out sa naasoy nga krimen.

Matod sa taho, nasikop si “Jack” sa iyang panimalay sa maong dakbayan mga alas-10:30 ang takna, kagabii (Huwebes).

Sigun ni Gensan PNP Director Col. Nicomedes Olaivar Jr. kabahin kini sa ilang gihingusgan nga hot pursuit operation batok sa mga mipatay kang Tampus.

Sa imbestigasyon sa kapulisan, nasayran nga tulo (3) ka mga suspek ang gikonsiderar nga responsable sa krimen: ang gunman, ang drayber sa getaway vehicle, ug ang look-out.

Human sa pagsukitsukit sa kapulisan, si alyas “Jack” giingong niangkon sa iyang tahas isip look-out ug uban pang importanteng impormasyon kalabot sa nasangpit nga krimen.

Sa laing bahin, padayon pang gipangita sa mga awtoridad ang laing duha ka suspek, lakip ang drayber ug ang gunman nga giilang si Lito Rehang.

Kalabot niini, nanawagan ang Gensan PNP sa publiko nga makig-alayon sa kapUlisan pinaagi sa paghatag og impormasyon nga makatabang sa pagtino sa nahimutangan sa nahabiling mga suspek. (Rem Agdon)