Subling magpatuman ug lockdown ang General Santos City government sa pipila ka mga lugar sa Brgy. Bula, human matala ang upat ka mga bagong kaso sa Covid-19 infections sa maong lugar.
Sa nakuhang impormasyon sa Rpn DXDX Gensan , gikataho nga apektado sa maong zonal lockdown ang Zone 3,4,5 old Palengke ug ang bahin sa Jose Divinagracia Street ug ang bahin sa Edilberto Lopez St.
Lakip sa maong mga pasyente ang duha ka 45-years old male, 24- years old female ug usa ka 22-years old male resident.
Una nang gikataho nga ang upat sa latest Covid-19 patients sa GenSan ang gituhuang natakbuyan sa virus gikan sa usa ka 58-years old Covid infected patient nga residente sa maong barangay.
“Nagsagawa kami uli ng panibagong contact tracing, kasi nga nalaman namin na mayroon pang ibang tao na nakasalamuha itong 58-years old patient natin. Pinag-aaralan din ngayon ang posibilidad na baka, baka lang mag-lockdown muli sa barangay,” ang tipik sa pamahayag sa source.
Gikumpirma usab sa maong resource person nga anak sa 58-years old patient ang usa sa latest Covid-19 case sa siyudad.
“Anak niya ang isa sa mga additional positive natin ngayon,” ang dugang pagkumpirma sa maong impormante nga adunay direktang kalambigitan sa pagpahigayon ug contact tracing activity.
Kahinumduman nga sa naunang gipagawas nga case history sa GenSan-LGU, gikataho nga 41 ang direktang nakahimamat sa pasyente ug 96 ang natudlo nga mga “secondary contacts.”
Nasayran nga subay sa timeline, August 10 ug 11, nakatambong kini sa usa ka haya sa Sitio Royeca, asa nagdula kini ug poker.
Nakabisita usab ang nahisgutan sa Fishport Complex niadtung August 12.
Niadtung August 13, nakabisita kini sa iyahang mga kabanay sa Datal Bulol sa Glan, Sarangani province ug sa pag-uli niini sa siyudad niadtung August 14, nakasinati na kini ug sintomas.
Niadtung August 16, luyo sa dili maayong paminaw sa panglawas, nahimo pang maka-bisita sa nasampit sa iyahang mga paryente sa Zone 4 sa Barangay Bula asa pagkagabii, na-admit na kini sa balay-tambalanan. (Leo Marten Cellan)