Local School Board Meeting Sa Dakbayan Sa Dipolog, Nagmalampuson

0
74

Malipayong gipasalamatan ni Dr. Virgilio P. Batan, Jr., ang kasamtangang City Schools Division Superintendent sa DepEd Dipolog ug Asst. Schools Division Superintendent Dr. Jay Montealto, si Mayor Darel Dexter T. Uy ug mga miyembro sa Local School Board gumikan sa ilang mainiton nga suporta nga gipakita alang sa preparasyon niini sa umaabot nga pagbukas sa klase sa tibook nasud karong Agosto 24, ning tuiga.

Human gipresenta ni Dr. Batan ang mga gikinahanglang logistics aron magmalampuson ang ipahigayong stratehiya sa pagtudlo ug leksiyon pinaagi sa mga gibag-ong “modalities” nga girekomendar sa nasudnong buhatan sa DepEd, gihatagan gilayon ug aksiyon ni Mayor Darel Uy ang pagpagawas ug pondo gikan sa Special Education Fund (SEF) sa lokal nga kagamhanan sa Dipolog, aron matubag ug mahatagan ug kasulbaran ang giatubang karon nga panginahanglanon sa pagprinta sa mga modules nga gikinahanglan sa mga magtutungha nga nagkinahanglan ug mokabat sa sobra ₱ 12 milyones ka pesos alang sa kapin kun kulang 27,000 ka mga magtutungha dinhi sa dakbayan.

Kahibalo-an nga ang SEF maoy usa ka pondo gikan sa 1% sa real property tax nga magamit sa sektor sa edukasyon, alang sa pagpalambo sa edukasyon sa LGU.

Dugang niini, gi-aprubahan usab sa Local School Board ang pagbutang sa usa ka “offline wireless router” alang sa “learning resources” sa 48 ka mga tulunghaan (38 ka elementarya ug 10 ka sekondariya); pagpalit ug pagbutang sa usa ka ekipo sa ICT alang sa pagtukod ug video production unit nga ipahimutang sa Library Hub nga nahimutang sa Zamboanga del Norte National High School; ug ang pagbayad sa upat ka oras nga “local radio airtime” ug “Cable TV Channel” aron sa pagsibya sa kaundan sa mga leksiyon sulod sa lima ka bulan.

Sa kasamtangan, gisagup sa DepEd ang “locally initiated modules” diin ang atong mga lokal nga magtutudlo ang naghimo gikan sa Grade 3 hangtud na sa Grade 12.

Gawas sa mga nahisgutang “logistical requirements”, gi-aprubahan usab sa Local School Board ang pagpagawas ug pondo alang sa balayronon sa mga “electrical installations” sa mga bag-ong school buildings sa ZNNHS-Turno Campus, Estaka Central School, ug Miputak East Central School; ug ang gastos sa pagpakutay ug internet connection sa 22 ka mga tulunghaan dinhi sa dakbayan.

Sumala pa ni Mayor Darel Dexter T. Uy, nga angay gayud nga mahatagan ug suporta ang atong sektor sa edukasyon gumikan kay ang edukasyon maoy dalan sa pag-asenso sa usa ka indibidual.

Gani buot sa Mayor nga dili gyud ihikaw sa mga kabataan ug kabatan-onan ang pagtabang nga mapalambo nila ang ilang kaugalingon ilabi na sa natad sa edukasyon. (OIC Lyza Bautista, RPN DXKD Dipolog)

Leave a Reply