Cebu City- Pormal nang gipirmahan sa gobyerno sa Japan ug sa Pilipinas ang kasabotan sa pautang alang sa duha ka dagkong proyekto lakip sa ikaupat nga taytayan nga magdugtong sa mainland Cebu ug sa isla sa Maktan o Lapulapu City.
Sa usa ka statement nga giluwatan sayo ning semanaha, ang embahada sa Japan sa Pilipinas mipahibawo nga si  Embahador Haneda Koji ug Kalihim Teodoro Locsin, Jr. sa foreign affairs mipirma sa loan nga kantidad og 154 bilyones ka yen o 73 bilyones pesos.
Gawas sa ikaupat nga Cebu-Mactan bridge, ang laing proyekto nga gastohan sa maong salapi mao ang  Phase 2 sa Davao City Bypass.
Segun sa  press release, ang taytayan gibanabanang mogugol og 119 bilyones ka Yen samtang ang bypass  35 bilyones ka yen.
Midugang ang statement nga ang nahisgotang proyekto nga gastohan sa Japan gitumong sa pagpaluag-luag sa trapiko sa nagkalambo nga mga metropolitan area sa Cebu ug Davao.
Ang duha ka proyeto kabahin sa ‘Build Build Build’ program sa kagamhanan diin ang  Japan ang kanunayng nagpaluyo.
Sa nasayran, mihimo og pagtuon ang JICA o Japan International Cooperation Agency niadtong 2018 ug misugyot sa pagtukod sa fourth bridge tali sa mainland Cebu ug Mactan island.
Pagka karon, nagpadayon na ang pagtukod sa ikatulong tulay nga nagdugtong sa siyudad sa Sugbo ug sa Cordova.