Nibisita bag-uhay lang sa probinsya sa Sarangani ang kanhing gobernador sa probinsya sa Ilocos Sur ug karon maoy presidente sa liga sa mga mayor sa entiro Pilipinas kon LMP/League of Municipalities of the Philippines, ang mayor sa munisipyo sa Narvacan, Ilocos Sur nga si Luis “Chavit” Singson.
Dala ni Mayor Chavit ang joint program nila sa LMP ug sa Gracia Telecoms nga mao ang Gracia Care Educational TV. Sa kini nga modality, makita ug madunggan sa mga magtutungha ang live ug recorded lecture sa ilang mga magtutudlo gamit ang satellite TV, nga pwede usab makita sa Facebook, YouTube ug ma-convert sa audio.
Sa gibuhat nga program orientation nila Mayor Chavit Singson ngadto nila Governor Steve Chiongbian Solon sulod sa Sarangani Capitol Gymnasium, anaa pud personal nitambong si DepEd Regional Director Allan Farnazo kauban ang halos tanang schools division superintendent sa Rehiyon Dose.
Anaa usab ang presensya ni Senador Manny Pacquiao kuyog ang tanang mayor sa Sarangani Province sa pagpanguna ni LMP Sarangani President at the same time LMP National Vice President for Operations Malungon Mayor Tessa Constantino, ug ang mayor sa Jose Abad Santos, Davao Occidental nga maoy LMP Vice President for Internal Affairs Mayor Jason John Joyce, sa pagsuporta nila Congressman Ruel Pacquiao ug Vice Governor Elmer De Peralta.
Gideklara na kagahapon nga gisibog ang pag-abri sa klase mahitabo na sa Oktubre 5. Dakong pabor kini sa mga taga-DepEd nga matagaan og igo-igo nga panahon sa pagpangandam.
Sa gikaingon na ni Governor Solon, daghan ang kapilian nga mga modality, anaay modular, online, radio-based ug instructional television. Mupili lang ang estudyante ug ginikanan kung asa muhaum ang ilang kahimtang kanang dili pud sila magastusan.
(Source: Provincial Information Office-Sarangani Province)