Usa ka patay nga lawas sa Lalaki ang napalgang wala nay kinabuhi didto sa Purok El Felebusterismo, Barangay Punta, dakbayan sa Dipolog mga alas 9:15 sa gabii Mayo 27,2024.
Nailhan ang maong patayng lawas sa Lalaki nga si Charley Ruel Bonilla Alterado,kinsa nakit-an nga nagbuy-od sa iyang higdaanan sulod sa iyang giabangan nga lawak nga grabe na ang pagkadugta.
Sa gihimong imbestigasyon,nasayran nga mga alas 9:00 sa gabii sa samang adlaw, si Reymart Palmares, 24 anyos, lalaki, ulitawo, residente sa Barangay Punta nibisita sa pinuy-anan ni Alterado aron maghatod og pagkaon mga alas 9:15 sa samang adlaw, apan namatikdan niya nga sirado ang pinuy-anay hinungdan nga gilantaw ni Palmares ang bintana ug didto nadiskobrehan nga patay na si Alterado.
Diha-diha dayun iya kining gireport ngadto sa kapulisan ug dali gilayon kining girespondehan ug sa pag-abot sa mga otoridad sa gihitaboan ilang gikumpirma ang presensya sa usa ka wala’y kinabuhi nga lawas.
Base sa interbyu sa mga silingan sa biktima gibutyag nga ang biktima nakigbugno sa mga sakit sulod sa dul-an sa upat ka tuig, lakip ang arthritis, gout, ug hypertension ug katapusan kining nakit-an nga buhi niadtong Mayo 24, 2024, sakay sa iyang motorsiklo sa Punta.
Nasayran nga ang ex-partner ni Alterado nga si Mrs. Jocelyn Uy Alterado, ang nakahibalo sa medikal nga kondisyon sa biktima.
Sa samang higayon,nakig alayon dayun ang mga otoridad sa City Health Office aron ipahigayon ang postmortem examination aron matino ang hinungdan sa kamatayon.
Samtang ang patayng lawas sa biktima gihatod dayon sa Rubio Funeral Homes sa Nabilid, Zamboanga del Norte. (Medalyn U. Borja)
(Source: Dipolog CPS)