Cebu City- Posibleng ipatuman o ipaubos sa lockdown ang probinsiya sa Sugbo karong semanaha.
Mao kini gipahibawo ni Gob. Gwendolyn Garcia sa press conference gahapon sa hapon dihang gianunsiyo sa Department of Health (DOH ) 7 ang gituhoang positibong kaso sa Covid 19 sa mga siyudad sa Sugbo ug Lapulapu.
Sumala pa ni Garcia moisyo siyag executive order nga magdeklarar sa lockdown human sa ilang miting sa mga mayor sa kalungsoran ug siyudad karong adlawa.
Gipasabot sa gobernador nga maminaw una siya sa panahom sa mga mayor sa dili pa niya ipaubos sa lockdown ang tibuok lalawigan.
Matod niya, himoon kini aron mahan-ay sa mga LGUs ang mga lakang nga angayng buhaton sa ilang tagsatagsa ka dapit.
Midugang ang gobernador nga ang probinsiya makiglambigit usab sa mga independent cities sa Cebu ug Lapulapu aron ma-synchronize ang deklarasyon.
Sa iyang bahin, si Brig. Gen. Albert Ignatius Ferro, director sa Police Regional Office kun PRO 7, mipahibawo nga magpakatap silag puwersa sa mga utlanan ug lutsanan sa lalawigan taliwa sa lockdown ug iseguro nga dili mabalda ang dis-og sa mga kargamento ug produkto.
Gipasalig ni Ferro nga ilang ipatugbaw ang rule of lawug ipakita ang maximum tolerance sa implementasyon sa lockdown.