Patay ang usa ka batan-ong taga-Zamboanga del Sur human kini gipusil sa usa ka pulis tungod lamang sa panaglalis samtang nag-inom sa usa ka barangay didto sa Calamba City, Laguna, Sabado sa kadlawon.
Naila ang biktima nga si Leovil Brian Gumera Pelletero, 19 anyos, taga- San Pablo, Zamboanga del Sur ug nagtrabaho sa 99 Blues Sport Apparel, usa ka sportswear shop sa Laguna.
Sumala sa inisyal nga imbestigasyon, bandang alas-2:25 sa kadlawon sa Ceris 1 Village, nag-inom matud pa si Pelletero ug ang iyang mga kauban ug nag-estoryahanay gamit ang ilang pinulongan samtang ang pulis ug ang iyang mga kauban nag-inom usab sa laing lamesa.
Human sa pipila ka minuto, kalit lamang nasuko ang hubog nga police officer ug nisangpot sa panaglalis sa duha ug hangtod sa pagpamusil sa batan-on.
Ang suspek nga si Corporal Javier Ian Medel, 37 anyos ug na-assign sa Cabuyao Police Station, boluntaryong misurender sa iyang armas pagkahuman sa insidente.
