Cagayan de oro – PATAY ang usa ka lalaki nga giingong giunay sa pagluba sa iyang silingan diha sa Zone 10, Talungan, Calaanan, Brgy. Canitoan, Cagayan de Oro City.
Ang namatay giila nga si Edison nga residente sa maong lugar ug maoy midunggab ang silingan niini nga si Antonio.
Giingong gikan sa bulangan ang biktima ug lango sa ilimnong makahubog apan dihang nakaabot na kini sa ilang compound gilayong giduolan kini sa suspek og gihimo ang krimen.
Gibutyag nga unang gitigbas ang biktima sa abaga ug gilayong gitiwasan sa suspek sa pagluba rason sa kamatayon niini.
Subay sa mga taho nga nagkabikil kaniadto ang magsilingan tungod lamang sa pagrekomenda ni Edison kang Antonio ug pamilya niini nga magbaton og kaselyas aron dili na mahimong pansayan ang bakanteng luna nga unahan lamang sa balay sa biktima.
Sa pagkakaron, gipangita na sa kapulisan sa Police Station 7 Bulua ang suspetsado nga si Antonio.
Written by Cheleste Simene
Photo by CdeO Headlines