Davao City – Kaso’ng kalapasan sa Republic Act 9165 kun Comprehensive Dangerous Drugs Act of 2002 ang gipasaka batok sa usa ka lalaki nga nadakpan tungod sa pagdala niini ug illegal droga.
Giila ang dinakpan nga si Engelbert Canopen, 39 anyos nga taga Purok San Roque, Barangay Sasa ning siyudad kinsa naharang sa Task Force (TF) Davao checkpoint sa Barangay Lasang ning dakbayan.
Gipamahayag ni Capt. John Louie Dema-ala, Public Info Officer sa Task Force Davao nga lunes sa gabii , Agosto 23 , sakay sa pampasaherong bus ang suspek pasulod dinhi sa Davao City, apan pag-hiabot sa bus sa TF Davao checkpoint sa Barangay Lasang , nasuta sa militar ug kapolisan nga duna kini dala nga illegal nga droga.
Mga pakete sa gituhoang shabu nga dunay gibug-aton nga 4.8 gramos nga mikantidad ug 76,800 pesos nakumpiska gikan sa posisyon ni Canopen hinungdan nga gidakop kini ug gipasakaan ug kaso.
(Source: Task Force Davao)