CAGAYAN DE ORO CITY- Temporaryo nang nagshutdown sugod kagahapong adlawa, Miyerkules Marso 18 segun sa kamanduan nga gipagula ni Laguindingan Mayor Diosdado Obsioma tungod sa kabalaka sa Covid-19.
Matud pa ni Airport Manager Engr. Job de Jesus nga ilang sundon ang maong kamanduan isip pag-ila nga ang lokal nga kagamhanan adunay katungod sa paghimo niini. Iyang gipasabot nga samtang kanselado ang passenger flights apan ang maong airport bukas pa gihapon alang sa cargo ug military flights. Dugang pa ni de Jesus nga sa wa pa ang executive order, ang airport way pugong sa ilang operasyon bisan pa gani sa pagdawat sa mga flights gikan sa Clark International Airport.
Ang maong kamanduan gihimo alang sa kaayuhan sa katawhan sa Laguindingan ug sa kasilinganang Lungsod.