Cebu City – Gipangayoan na og tubag sa piskaliya si Kong. Paz Radaza sa Lapulapu City sa reklamo labot sa kamatayon sa usa ka batang lalaki nga nakoryentehan sa iyang yuta sa brgy. Tungasan, Olango Island.
Nakadawat og subpoena si Radaza gikan sa City Prosecutor’s Office niadtong Martes nga naghatag niyag napu ka adlaw sa pagtubag sa pasangil sa inahan sa bata nga si Rosie Taneo.
Gawas kang  Radaza, giapil usab pagkeha sa inahan ang iyang piniyalan sa balay ug yuta  nga si  Ricardo Inoc.
Sumala pa sa kongreswoman, giandam na sa iyang mga abogado ang tubag sa maong reklamo.
Masaligon ang magbabalaod ug kanhi mayor nga dili makalusot sa piskaliya ang kaso.
Sa nasayran, namatay ang 12 anyos nga bayungbayong niadtong Mayo dihang mikatkat kini sa koral sa balay ni Radaza aron manguha og bunga sa mangga uban sa usa ka higala.
Walay kalibotan ang bata nga adunay live wire nga gipabitay sa paril hinungdang kini nakoryentehan.
Lakip sa kasong gisang-at sa inahan sa biktima batok kang Radaza ug Inoc mao ang murder, paggamit og makamatay nga butang ug nga tinuyo o giplano ang krimen.
Atol sa virtual press conference gahapon, si Radaza miingon nga natingala siya nganong giapil man siya sa kaso nga wala man siya sa lugar sa pagkahitabo. (Jhon Tadlip/ JTY)
(Source: Cong. Paz Radaza)Â