Cebu City – Masuweldohan na gyod karong adlawa ang mga kawani sa lungsod sa Barili nga wala masuweldohi sukad magpositibo sa Covid 19 si Mayor Marlon Garcia.
Mao kini gipasalig ni Bise Mayor Julito Flores sa iyang paglingkod isip acting mayor gahapon sa buntag.
Matod pa ni Fores, baleg usa ka buwan nga suholan ang madawat sa mga empleyado.
Si Flores, nga bag-ohay lang usab naayo sa impeksyon ug mibalik sa trabaho karong semanaha, unang nagduhaduha pagsilbing acting mayor sa katarongan nga wa siyay nadawat nga appointment gikan sa DILG.
Nahinabi sa DYKC Karambola Bisaya , matod sa mayor mipahigayon sila og special session ang konseho kaganinang alas 9 sa buntag aron pagpalabang og resolution nga maghatag niyag pagtugot pagpirma sa disbursement sa suweldo sa kapin sa  300 ka casual employees.
Midugang si Flores nga ang proseso sa  payout himoon dayon human sa pagpirma aron segurong masuweldohan ang mga kawani sa dili pa matapos ang adlaw.
Duha ka suweldohan ang madawat sa mga empleyado – Agosto 15 ug 31.
Kon mahinumdoman, si Gob. Gwendolyn Garcia ang unang mibutyag sa kahimtang sa iyang igsoong mayor sa Barili. (Jhon Tadlip/ JTY)
(Source: Phone Interview with Mayor Julito Flores over DYKC Karambola Bisaya Program)