Nagpabiling blanko pa ang General Santos City Police Office sa ginahimong pagpanubay sa natala nga mga missing persons sa siyudad.
Una nang midangop sa kapulisan ug nagpatabang sa social media ang pamilya nilang John Mark Obeda Impang, 19 years old nga residente sa Bagong Pag-asa, Hangar, Phase 2, Barangay Mabuhay; Armando Gomez Guajo, 47 years old nga residente sa Ma. Theresa Village, Barangay San Isidro ug Jefferson Garay Quita, 17-years old sa Bogaville St. sa Barangay San Isidro.
Matod pa ni GSCPO-Station 4 commander, P/Capt. Abdulsalam Mamalinta, ulahing nakitan sa iyahang mga kabanay si Impang niadtu pang April 2.
Samtang si Guajo, ang gikataho nga nawala niadtung April 20 ug April 10 usab ulahing nakitan sa iyahang pamilya si Quita.
Padayon usab ang ginahimong background checking sa kapulisan, partikular ang mga grupo nga posibleng gikalambigitan sa mga nasampit.
Alayon niini, nanawagan usab ang kapulisan ngadtu sa adunay mga impormasyon kalabot sa nahisgutang mga indibiduwal nga gilayong makig-alayon sa mga otoridad. (John Rey Somido)