Cebu City – Nagtinguha ang Kapitolyo pagbawi sa 679 ka metro kwadradong luna sa Gorordo Avenue nga gidonar sa milabayng administrasyon ngadto sa Criminal Investigation and Detection Group o CIDG 7 niadtong Agosto 2018.
Alang ni Gob. Gwendolyn Garcia, depektoso ang naasoyng donasyon sanglit miduso ang COA o Commission on Audit og observation nga ang donasyon walay approval niini.
Ang naasoyng donasyon, matod ni Garcia, angayng i-revoke ug mopirma og deed of usufruct tali sa CIDG alang sa laing luna nga sabotan sa duha ka kampo sa naasoyng government center.
Suma pa niya, ang yuta sa Gorordo Avenue, nga adunay commercial value nga ₱ 88.3 milyon o ₱ 130 mil matag metro kwadrado wa pa madonar.
Gani, mahimo kining ireklamo sa Office of the Ombudsman sa katarongan nga grossly disadvantageous kini sa probinsiya.
Nagkanayon si Garcia nga di mahimong idonar ang maong luna tungod kay aduna pay available nga yuta sa “government center” sa Sudlon, Lahug, Cebu City diin nahimutang ang CPPO, PDEA, Crime Laboratory, ug Cebu Provincial Women and Children Development Center.
Iyang gidasig ang CIDG 7 pagbalhin didto pinaagi sa usufruct agreement. (Jhon Tadlip/JTY)
(News & photo courtesy of Cebu Provincial Government)