Cebu City – Nagtinguha si Gob. Gwen Garcia nga mabawi ang CICC o Cebu International Convention Center sa dakbayan sa Mandaue human mabasura sa Ombudsman ang kasong pangurakot nga iyang giatubang sa katukoran sa maong pasilidad.
Atol sa press conference, giangkon ni Garcia nga nalipay siya sa nakab-ot nga hukom sa state anti-graft body pag-abswelto kaniya ug sa laing 11 ka respondent sa kaso.
Nagkanayon ang gobernador nga nagpasalamat siya sa Ginoo nga bisan sa pagmaniobra sa iyang mga kaatbang sa politika iya gihapong nakab-ot ang hustisya.
Suma pa ni Garcia, buot niya nga ma-recover ang kabtangan nga nagyaka sa 28 mil ka metro kwadradong luna sa reclamation area sa Mandaue.
Subay niini, gipahibawo ni Garcia nga naglaraw siya paghulma og technical working group ngamo-review sa kasabotan tali sa Kapitolyo ug sa gobyerno sa Mandaue pagbaligya sa CICC sa panahon ni kanhi gobernador ug karon Bise Gob. Hilario Davide III.
Midugang ang gobernador nga pagasakpan ang grupo sa mga sakop sa hunta probinsiyal ug sa mga consultants sa Kapitolyo.
Base sa record, gipalit ang CICC sa kagamhanan sa Mandaue niadtong 2017 sa kantidad nga ₱ 300 milyones. (Jhon Tadlip/JTY)
(Source & photo courtesy of Cebu Provincial Government)