Detenado karon sa buhatan sa kapulisan ang 40 anyos nga lalaki human kini nanumbag sa usa ka kapitan sa lantsa. Naila ang suspetsao nga Roel Cayacay Golandrina, 40 anyos, usa ka laborer, residente sa Purok-1, Brgy. San Juan ning dakbayan sa Surigao. Samtang ang biktima naila nga si Regino Consigna, 65 anyos, kapitan sa lantsa, residente sa Purok Kalipayan, Brgy. Talisay, San Benito Surigao Del Norte. Natigayon ang insidente sa may boulevard area, Brgy. Taft, sa may 7:30 ang takna sa buntag kagahapong adlawa Marso 28, 2019.
Basi sa imbestigasyon ni Police Sergeant Lyndon Gerarcas, an investigator on case, nga sumala pa ang biktima nagtindog sa may daplin nga bahin sa hagdan sa lantsa ug siya kalit nga gisumbag sa suspetsado sa walay igong rason hinungdan nga ang duha nagsinumbagay. Ang suspek gituohan nga ubos sa impluwensya sa ilimnong maka-hubog.
Human sa maong panghitabo, dali nga miresponde si PSSgt. Gleen Jelmer Antonio nga maoy naka-assign sa boulevard area ug didto gidakop ang maong suspetsado. Ang suspek anaa detenado karon sa may Surigao City Police Station ug posibleng pasakahan sa kasong physical injury.