Nagmalamposong gipahigayon ni Barangay Kapitan Jeprox Yumang sa San Isidro ning syudad sa GenSan ang iyang SOBA kon State of Barangay Address kagahapong adlawa adlawa uban sa pag report sa katawhan sa ilang mga accomplishments bisan pa man sa hagit sa Covid 19 pandemic.
Matud pa niini nga dili malilong nga apektado ang maong barangay ug mitala sa pinakadaghang nag positibo sa kasong sa Covid 19 apan bisan pa man niini wala nila gipasagdan ang katawhan ilabina sa pag ayuda sa mga panginahanglan pagkaon ug uban pang mga welfare goods .
Wala usab sila pasagdi matud pa sa pamunuan sa local nga gobyerno sa syudad ni Mayor Ronnel Rivera .
Aminado kining pipila sa ilang budget kon resources sa barangay ang na revert ug nagamit sa pondo alang sa pag ayuda sa katawhan ug mga pondo nga nagamit isip Covid 19 funds tungod limitado ra usab ang quick response fund niini sa barangay hinungdan nga naapektuhan usab ang mga budget sa mga imprastraktura ug uban pang programa ug proyekto sa Barangay .
Nagpasalamat usab kini sa LGU GenSan sa pagbutang ug mga pasilidad ug swab testing sa iyang barangay tungod nakatabang kini dili lamang sa taga Barangay San Isidro apan sa uban pang mga barangay sa GenSan.
Nanawagan usab kini ug panaghiusa sa mga katawhan ug mga taga barangay alang sa mas mauswagon nga bag –ong tuig 2021.
Samtang ang ubang mga barangay isip pag comply sa direktiba sa DILG sa pagpahigayon ug barangay assembly gihimo kini pinaagi sa rekorida susama sa gihimo ni Barangay Fatima Kapitan Renante Curit nga nagbutang ug trumpa sa mga sakyanan ug gipalibot sa tanang mga Puroks ug gipahibalo ang katawhan sa mga gihimo nga mga programa ug proyekto sa maong barangay.
Ang barangay Fatima adunay kapin 50 milyones ka pesos nga budget sa usa ka tuig nga operation ug mosaka pa kini sa tuig 2021.
Mitimbaya si Kapitan Curit sa tanang mga constituents sa pagsaulog sa Pasko ug umaabot nga bag-ong tuig 2021. (Roniel Degorio, RPN DXDX GenSan)