Cebu City – Mokabat na ug kapin sa 1,075 ka mga health care workers sa Vicente Sotto Memorial Medical Center (VSMMC) sa Syudad sa Sugbo ang nabakunahan sa CoronaVac, ang vaccine batok sa Covid-19 nga ginama sa Sinovac Biotech Ltd. sa China, pagka alas 11 sa buntag, adlawng Domingo, Marso 7, 2021.
Sa maong gidaghanon dunay 41 nga naka sinate ug mild adverse effects human nabakunahan ug way bisan usa nga naka sinate ug seryos ug grabe nga epekto.
Basi kini sa impormasyon gikan sa Facebook Page sa VSMMC.
Mi-abot na sab sa 2,062 ka mga empleyado sa VSMMC ang gidaghanon sa mga mipalista nga magpabakuna.
Matod ni Dr. Mary Jean Loreche, tigpamaba sa Department of Health (DOH) 7 nga ang reaksyon human mabakunahan sa vaccine normal lang kini gumikan kini sa iyang gihulagway nga ” that it does not recognize as part of its own.”
Sigon pa ni Loreche nga ang sagad nga adverse events mao ang labad sa ulo, pagsaka sa blood pressure, pamoypoy sa lawas ug way kusug.
Apan kadtong adverse events nga pag develop ug rashes, allergies ug paglisud sa pag ginhawa nagkinahanglan na kini ug close monitoring.
Human ma bakunahan ang pasytente i-assess kini sud sa 25 ngadto sa 35 ka minutos gikan sa pag injection pinaagi sa Regional Epidemiology and Surveillance Unit sa DOH kinsa mangulo sa pag monitor sa adverse effects human sa inoculation.
Nasayran nga ang VSMMC maoy unang hospital sa Central Visayas nga nagsugod sa vaccination rollout pagka Marso 4, human madawat ang 72,200 doses sa Corona Vaccines alang sa mga health care workers niadtong Marso 2.
Samtang ang Governor Celestino Gallares Memorial Hospital sa Syudad sa Tagbilaran Lalawigan sa Bohol mipahigayon sa ilang ceremonial vaccination niadtong adlawng Sabado, Marso 6.
(News & photo courtesy of Vicente Sotto Memorial Medical Center)
