Nakapauli na sa ilang tagsa-tagsa ka dapit natanggong sa Sugbo nga mga OFWs o overseas Filipino workers.
Pinaagi sa pagtinabangay sa lainlaing ahensiya sa gobyerno sa Central Visayas, ang mga OFWs nga natanggong tungod sa ECQ o enhanced community quarantine nakabalik na sa ilang isigka probinsiya.
Sumala pa sa Overseas Workers Welfare Administration kun OWWA 7, labing minos 274 sa  818 ka OFWs nga na-stranded sa lainlaing bahin sa Cebu nakapauli na sa ilang tagsa-tagsa ka lalawigan.
Si Direktor Mae Codilla sa OWWA-7 miingon nga ang mga OFWs nagpabilin sa Sugbo kay gipaubos pa man sa 14 ngadto sa 21 ka adlaw nga kwarantina samtang nagpaabot sa resulta sa ilang swab test.
Ug kadtong nagnegatibo sa virus gihatod ngadto sa ilang tagsatagsa ka dapit pinaagi sa Malasakit route sa mga private shipping companies nga nagtugot sa homeward return sa mga stranded workers.
Matod pa ni Codilla, ang pagpapauli sa mga OFWs natigayon pinaagi sa pagtinabangay sa pipila ka ahensiya sama sa Department of Health (DOH), Maritime Industry Authority (MARINA), Philippine Coast Guard (PCG), Philippine National Police (PNP), ug Department of Interior & Local Government (DILG).