Cebu City-Â Nawad-an sa ilang panimay ang mga nagpuyo sa Bonbon, bukirang barangay sa dakbayan sa Sugbo, duol sa sapa sa Mananga, tungod sa mitumaw nga flashflood sa milabayng adlaw.
Mao kini gitug-an sa pangu sa CDRRMO o City Disaster Risk Reduction Management Office, Harold Alcontin.
Nahinabi sa media, si Alcontin miingon nga niadtong Lunes sa gabii nagbunok ang uwan sa bukirang barangay hinungdang misaka ang tubig sa Mananga river ug gibanlas ang mga parte sa 22 ka balay sa sityo Managoksok ug Upper Biasong.
Subay niini, ang mga sakop sa DSWS o Department of Social Welfare and Services nangadto sa Bonbon aron pagpanghatag og pinutos nga pagkaon sa apektadong mga pamilya.
Sumaa pa ni Alcontin, nagbutang na silag disaster officer sa lugar sa pagtuo nga magpadayon pa ang uwan-uwan sa mosunod nga mga adlaw busa pa kuyaw sa laing flashflood o landslide.
Sa iyang bahin, ang asst. head sa DSWS, Jonil Matuguina, mitug-an nga naghimo na sila og  house-to-house validation sa nahitaboan alang sa financial aid.
Midugang si Matuguina nga ang mga  food packs nga ilang giapod-apod molanat og tulo ka adlaw sa pagkonsumo. (Jhon Tadlip/JTY)
(Source: Cebu City Public Information Office)