Cebu City – Gipasakahan na og kaso sa Criminal Investigation & Detection Group o CIDG-7 ang 90 ka tawo sa rehiyon lakip sa mga opisyal sa gobyerno nga nalambigit sa kahiwian sa pagpanghatag sa hinabang salapi ubos sa SAP o social amelioration program.
Gisultihan ni Major Ronald Allan Tolosa, deputy director CIDG-7, ang mga reporters gahapon nga ila nang gisang-at sa korte ang sumbong kalapasan sa Republic Act 3019, o anti-graft and corrupt practices act; RA 6713, o code of conduct and ethical standards for public officials and employees; ug RA 11469 o Bayanihan to Heal as One Act.
Ang mga opisyal sa gobyerno nga nag-atubang sa kaso gilangkoban sa 23 ka barangay kapitan, 13 barangay kagawad, usa ka SK Chairman, tulo ka barangay secretary, upat ka barangay health worker, walo ka Purok leader, upat ka social worker, tulo ka barangay tanod, ug lima ka SAP enumerator.
Aduna usay 26 ka indibiduwal nga midawat sa SAP assistance bisag dili kalipikado sa ingon.
Ug sa 23 ka barangay kapitan, tulo ang gikan sa Cebu City ug kini mao ang kapitan sa Zapatera, Basak-San Nicolas, ug San Jose.
Matod ni Major Tolosa, ila nang nasang-at ang sumbong ug nagpaabot na lang sila sa resolution sa korte.
Nagsugod ang imbestigasyon niadtong Abril dihang unang giapod-apod ang ayuda sa SAP sa mga benepisyaryo l via Jhon Tadlip/JTY
(Source: CIDG – VII)