Cebu City – Mitahan sa iyang kaugalingon human malutsi ug warrant of arrest sa kasong Bribery ang kanhi hepe sa Argao Police Station nga nahimong kontrobersiyal human gika relasyon ang maanyag nga piniriso sa kasong ilegal nga drugas.
Si kanhi Police Major Ildefonso Miranda ang mitahan sa iyang kaugalingon ngadto sa Bogo City Police Office, Huwebes sa kaadlawon Abril 30, 2021.
Giisyu ni Judge Noel Darren Damian sa RTC Branch 26 sa lungsod sa Argao ang warrant of arrest sa 2 counts of direct bribery.
Gibutyag sa desk officer sa Bogo City Police Station , Police Master Sergeant Joel Bino, nga pasado alas 5 sa kaadlawon mitahan si Miranda sa ilang buhatan.
Si Miranda lumad nga taga barangay Taytayan siyudad sa Bogo, didto na kini nag estar human gitaktak sa serbisyo.
Nag atubang ug kaso si Miranda human kini gilusob sa mga sakop sa Integrity Monitoring and Enforcement Group (IMEG)- Visayas Field Unit niadtong Marso 5, sa milabay nga tuig.
Nakapyansa siya ug 120,000 mil pesos bugti sa iyang temporaryong kagawasan.
“Mga around 5 am gyud to personally ni siya nga miari sa police station kay naa siyay warrant mao to gi effect ang arrest nato sa iyaha,” butyag sa desk officer.
Kahinumduman nga si Miranda gidakop sa mga sakop sa IMEG Visayas niadtong Marso 5 sa alas 11 sa gabii, sa Argao Police Station.
Kini human maka dawat og report nga ang dinakpan niini nga usa ka Jenie Villanueva sa kasong pagpamaligya sa illegal nga drugas wala gisulod sa selda ug didto sa iyang kwarto gipa estar ug gidug.
Nasaksihan pa sa nga operatiba si Miranda nga nakig dulog kang Villanueva sa iyang lawak.
Dihang dalhon na unta sa mga sakop sa IMEG misuway si Miranda ug “bigay” sa mga operatiba maka duha ka higayon, hinungdan sa maong kaso.
Pagka Abril 20, sa miaging tuig gi pirmahan ni Police Brigadier General Albert Ignatius Ferro kinsa hepe sa Police Regional Office 7 niadtong higayon ang dismissal order ni Miranda. (Jhon Tadlip/JTY)
(News & photo courtesy of Bogo City Police Office)