Hingpit na gyud nga nabakunahan si Gobernador Bambi Emano karong adlawa, Abril 26, 2021, gamit ang Sinovac Vaccine.
Kini human gipanghingusgan sa DOH – Region X nga mabakunahan na ang Gobernador subay sa Advisory No. 26 sa National IATF kung asa giila ang Misamis Oriental isip usa sa mga High Risk Provinces sa nasud.
Unod usab sa advisory nga isaka ang klasipikasyon sa mga Local Chief Executives ngadto sa A1.5 Classification human giila sa National IATF nga essential ang papel sa mga Local Chief Executive sa pagpakigbatok sa COVID-19.
Atol sa pagbakuna kaniya, mensahe ni Gobernador Bambi Emano ngadto sa katawhan nga iyang panghingusgan nga mabakunahan usab sa daling panahon ang kinabag-an kay sayod siya nga kini usa sa iyang mga responsibilidad isip usa sa Local Chief Executives nga naunang nabakunahan.
Gipaabot sab niini nga kung aduna nay vaccines dili magduha-duha sa pagpabakuna ang katawhan gumikan kini lamang ang bugtong paagi nga maluwas ang katawhan ug mobalik sa normal ang tanan. (Provincial Information Office – MisOr)