Mihimo dayon sa pagbisita si City Vice Mayor ug Acting City Mayor Senen O. Angeles ngadto sa mga nasunogan kagahapong adlawa, Nobyembre 4, 2023, sa may kapin kon kulang alas 8:00 ang takna sa buntag didto sa Bypass Road, Barangay St. Isabel, aron sa paghimo sa pagsusi sa kahimtang niini, uban na sa paglugway sa hinanaling tabang ngadto sa mga apektado.
Kahinumduman mipadala gilayon ug mga personahe ang kagamhanang lokal sa Dipolog didto sa nahitabong sunog sa Barangay Sta. Isabel ilabi na sa mga personahe gikan sa City Social Welfare and Development Office ug City Disaster Risk Reduction and Management Office aron sa pagtambayayong sa mga Barangay Community Volunteers ug mga opisyales sa Barangay, kinsa hiniusang mihimo sa Rescue Operation, lakip na sa pagpahalona sa mga apektado ngadto sa Evacuation Center, sa Sta. Isabel Covered Court, ingon usab sa paghatag sa ayudang pagkaon.
Lakip sa mga gilugway nga tabang ngadto sa mga nasunongan mao ang mga hygiene kits gikan sa CDRRMO, mga pagkaon o hot meals pinaagi sa CSWDO nga gi-andam sa mga Barangay workers sa pagpanguna ni Sta. Isabel Punong Barangay, Rodel Enero. Samtang mipa-abot usab sa ilang tabang nga mga Food packs ang PDRRMO ug Dipolog Eagles Club sa pagpanguna ni kanhi Board Member, Ronillo Lee, ug tag 10 kilos nga bugas ug grocery items gikan usab sa Dipolog Medical Society pinaagi ni Dr. Horacio B. Velasco.
Aduna usa’y mga tambal ug bitamina nga gipanghatag gikan sa City Health Office, uban sa pagpahigayon usab og “Fogging”.
Isip proseso, gipa-ilawom usab sa “Stress Debriefing” ang mga biktima pinaagi sa CSWDO uban na sa mga ECCD Workers.
Kalabot usab ning maong kalamboan, naglaraw karon ang buhatan sa Department of Social Welfare and Development-SWADT nga molugway og cash assistance alang sa pagtukod og balay sa mga nasunogan.
Sigun sa dugang nasayran, nga karong adlaw nga Lunes, Nobyembre 6, 2023, usa ka hinanaling tigum ang gipatawag ni City Vice Mayor ug Acting City Mayor Senen Angeles, aron sa paghisgot sa dugang tabang alang sa mga apektadong pamilya.
Kahibalo-an nga mikabat ngadto sa 14 ka pamilya o 51 ka mga indibidwal ang nahimong apektado sa nahitabong sunog kaniadtong kagabhi-on sa adlaw’ng Biernes, Nobyembre 3, 2023, didto sa Barangay Sta. Isabel, ning siyudad.
(Source: Dipolog City Government Facebook page)