Iresponsable, ini an nalitok ni Atty. Jerry Centro reaksion sa matud pa pamahayag ni Director Kristina Cassion, Regional Director nan LTFRB Caraga, “kun gusto tabangan nan ciudad an mga driVer sa multicab na tagpandakop nan LTFRB, ini ra kan an mobayad sa 5mil ka pesos na multa.”
Matud pa ni Atty. Centro na waya may unta problema kun nohimo pa nan koordinasyon an LTFRB Caraga sa ila plano na an HATSCO, isa ka cooperatiba an ila hatagan nan special permit para sa pag biyahe dinhi sa suyod nan ciudad Surigao.
Dugang pa ni Atty. Centro na dako an ila kadismaya sa kagamhanang lokal, human na kalit an LTFRB na nagdakop sa mga multicab nan tradisyunal na public transport sa pipila ka bahin na wayay konsultasyon sa ciudad nan Surigao.
Matud pa ni Atty. Centro na apektado an panginabuhian nan mga driver sa multicab labi na gikan pa sa jadton panahon nan ECQ na tag suspenso an public transport takpan pa na waya makahatag nan serbisyo hangtud kuman an tagpaboran nan LTFRB na transport cooperative na naghatag dugang kalisod sa katawhang Surigaonon. Tagsulti ni Atty.Centro, an City Administrator sanan tigpamaba ni Mayor Estong Matugas na desidido na sila na ipaabot sa central office nan LTFRB an aksion ni Dir. Cassion. (Jhino Parrucho | Ronda 10 | RPN DXKS)
Link : https://www.facebook.com/RPNSurigao/videos/709917153112002/