Iriga City – Ibinuyagyag sa Sangguniang Bayan kan Bula, Camarines Sur an man lain-lain na irregularidad sa mga proyekto na pinag-iimplementar kan local na gobierno.
Iyo ini an laman kan privilege speech ni Konsejal Nono Decena matapos na sabihon na may sabwatan an Bid and Awards Committee asin si Alcalde Migay Ibasco na saro man na kontratista.
Sigun sa konsejal enbuelto digde an maabot sa 30 milyones pesos na fundo na kun sain dai nag-agi sa tamang proseso asin mayo nin magkakanigong transparency.
Inot kaini, dati naman na kinasuhan an alcalde sa ombudsman huli sa over pricing kan bagas na ibinariwas sa mga biktima kan tinamaan kan pandemya.
Nangapudan pa si Decena sa mga head of office na dai makipagsabwatan sa mayor kun habu nindang madamay sa mga kasong inaandam kan sangguniang bayan.
(OIC Melvin Barayoga, RPN DZKI Iriga)
(Source: LGU Bula, Camarines Sur)