Mawot pakusugon kan local na gobiyerno kan cuidad nin Naga, siring man kan Departamento de Educasyon an mga programa asin sa pagpapahiwas nin impormasyon sa pag ilag o pag iwas sa teenage pregnancy asin sa pagtabang tangani na makapag adal an hoben na mga nagbados.
Segun sa pahayag ni councilor Lito Del Rosario, Chairman kan Committee on Education, sinabe kaini na sa siring na paagui maiibitaran an arog kaning problema asin kaipuhan man na may aram an mga magurang sa pagmonitor kan saindang mga aki nangorog na balik sa face to face an klase.
Mantang sa reaction man ni principal Sulpicio Alfarez, kan Camarines Sur national high school, sinabe kaini na padagos an saindang ginigibong mga aktibidades asin orientation komo paguirumdom sa saindang mga estuyante mantang nagkaegwa nin kaso sa sainda na padagos na minomonitor.
Tinatabangan ninda para makapagpadagos sa pag adal nakunsain nagiging angat pa ini sa mga paratukdo nin huli ta nagiging dagdag pa nin trabaho sa sainda imbes na sa pagtukdo sana. (Joey H. Lim)
