Iriga City – Dadakupon kan Iriga PNP an mga para-mama sa pampublikong lugar sa cuidad asin an mga modified na tambutso kun sain nakaka-disturbo kun dis-oras nin Bangui orog na sa mga senior citizens asin mga yaon sa online class.
Iyo ini an ipinahayag ni LT Bella Vergara Cereno, Deputy Chief of Police kan Iriga PNP matapos na maka-olay kan Radio Ronda katakod kan ipinapasunod na mga ordinansa kasabay kan saindang higot na implementasyon sa health protocol ngunian na pandemya.
Tinaw’an nin duon kan opisyal na an siisay man na madadakop na nagmamama sa pampublikong lugar ini nakatalaan na ticketan na an multa maabot man sa 500 pesos.
Sa cuidad nin Iriga, dakol an mga paramama na konsideradong bisyo na nagdadara nin ati sa kapalibutan.
Mientras tanto, duman sa mga motor na igua nin maribok na tambutso sinda man nakatalaan na ticketan asin na sa magkapirang beses na violasyon posibling baklason pa an maribok na tambutso O kaya maimpound mismo an motorsiklo.
(Photo courtesy of Iriga CPS Official Facebook Page)