Sarong lalaki na residente kan Brgy. Dugcal, Camaligan an pinagbabadil sa banwaan kan Bato, Camarines Sur.
Susog sa report kan Bato Municipal Police Station, poco mas o menus 3:30 PM suodma, Abril 11 kan maganap an pambabadil sa Bgry. Goyudan, Bato, Camarines Sur.
Nagluluwas sa inisyal na imbestigasyon na mantang nagdedeliver an biktima kan saiyang mga produkto sa sarong residencia sa nasambit na lugar, duwang (2) dai pa nabibistong lalaki na armado nin badil an nagrani sa saiya.
Basado pa sa Bato MPS, nagkaigwa nin komosyon sa pag-ultanan kan duwang lado, dahilan para badilon kan mga suspek an likod kan biktima na nagresulta sa pagkaka-irido kaini. Nagdulag man tulos an mga suspek pasiring sa dai pa madeterminaran na direksyon.
Marikas na idinalagan an biktima sa ospital kan mga tawo sa lugar, tulos man na naka-abot sa kaaraman kan Bato MPS an pangyayari.
Sa ngonian, padagos pa an ginigibong follow-up investigation kan mga personahes kan nasabing hepatura para dagos nang maidentipikar an pagkakabistuhan kan mga suspek asin maaresto an duwa. (Jv Navarro Verdeflor Jr)
(Source: Bato MPS)