Gigibuhon sa kada pesta 15 asin 30 kan bulan an Kadiwa ng Pangulo sa Bicol Region. Ini an inanunsyo ni Department of Agriculture Regional Executive Director Rodel Tornilla matapos na maging matrayumpo an enot na duwang aldaw kan aktibidad sa Camarines Sur kun sain sobra sa 1.2 milyon pesos an naging kita kan 41 stalls na partisipar digdi.
Segun kay Dir. Rodel Tornilla sa paaging ini matatawan nin pagkakataon an mga Bicolano na makabakal nin mga baratong produkto hale sa kooperasyon kan lokal na paraoma, micro small and medium enterprises, kaibahan an bagas na kantidad 25 pesos kada kilo kan National Food Authority, asukar na nasa 70 pesos na kilo hale sa Sugar Regulatory Administration asin mga fish products naman sa Bureau of Fisheries and Aquatic Resources (BFAR).
An nasabing programa pig-inisyar kan administrasyon ni Pres. Ferdinand Marcos Jr. bilang sekretaryo kan Dept. Of Agriculture na an katoyohan iyo an matabangan an lambang indbidwal na makabakal kan saindang pangangaipo sa hababang kantidad. (Jv Navarro Verdeflor Jv via Dept. of Agriculture Bicol, photo credits to the owner)