Iriga City – Pasiring pa sana sa 30-35% kan target population sa cuidad nin Iriga an natudukan nin bakuna poon na magsikad an vaccination roll out kan bulan na Abril presenting taon.
Iyo ini an ipinahayag ni Mayor Madel Yorobe Alfelor kasunod kan abiso na puedi na ngunian an mga walk-in sa arin man na vaccination site sa cuidad.
Tinaw’an kaini nin duon na dai na mamili nin bakuna an mga taga-Iriga huli ta gabos na bakuna bastang nag-agi sa FDA ini epektibo asin makakatabang tanganing dai tamaan kan malalang hilang na dara kan covid-19.
Positibo an pagtubod kan alkalde na kun suficiente an mag-abot na stock kan bakuna sa masunod na tulong bulan posibling makua na an target population kan cuidad na poko mas o menus 80 mil na Irigueno.
Nagpahayag pa nin pasasalamat si Alfelor sa gobierno nacional huli sa padagos na suporta sa cuidad nin Iriga na maalokaran nin awad-awad na numero kan bakuna.
An vaccination roll out sa cuidad an dinadara naman sa man lain-lain na parte kan cuidad nganing mairani sa tawo an nasabing serbisyo.
Kan nagtalikod na aldaw nagkaigua nin pag-bakuna sa mismong business district kan cuidad, asin nakatalaan naman na mag-schedule sa hararayong barangay kan Iriga.
(Photo courtesy of Iriga City Official Facebook page)
