Cebu City – Nakasinate ug paglain sa ilang tiyan ang 26 ka mga performers sa usa ka religious event sa IC3 Convention Center sa Syudad sa Sugbo, alas 4:27 sa hapon, Mayo 23, 2021, nga gituuhang gumikan sa food poisoning.
Matod ni Ramil Ayuman sa Cebu City Disaster Risk Reduction Management Office (CDRRMO), gitumbok ang humba ug itlog nga giputos sa plastic nga gikaon sa 21 ka mga babaye ug lima ka mga lalake maoy hinungdan sa paglain sa ilang lawas.
Gi respondehan sa CCDRRMO Incident Management Team, inabagan sa ERUF ug Red Cross ug gipangdala sagad sa Perpetual Socour Hospital ug Velez Hospital ang 16 ka indibidwal gikan sa 26 ka mga performers.
Ang maong kalihukan tipik ug kabahin sa 500 years of Christianity.
Giatiman hinoon sa Archdiocese sa Sugbo ang medical nga panginahanglan sa mga participants.
Ang command center nakadawat sa report sa “food poisoning” alas 4:27 sa hapon, Mayo 23, 2021.
Mipadala ug unom ka ambulansya ang Cebu City, samtang tagsa ka ambulansya sa SRS Rescue Team, Red Cross ug Eruf.
Ang caterer nga wala pa gibutyag gi ingong nag base sa taga Lapu-Lapu city.
Sigon pa ni Ayuman gi turnover na ang gituhuang pagkaon nga nakahilo sa mga partisipante ngadto sa DOH Regional Surveillance Unit. (Jhon Tadlip/JTY)
(News & photo courtesy of Cebu City Risk Reduction and Management Office-CCDRRMO)
