Cagayan de Oro – Nagpahigayon ang Human Resource Management Department (HRMD) sa ilang tinuig nga outreach program alang sa 28 ka mga kabataan nag-edad og 8-17 anyos kinsa mga biktima sa pang-abuso, biniyaan ug pinasagdan, Septiyembre 15, diha sa Calabrian Children’s Foundation, barangay Bayabas ning siyudad.
Dala sa grupo ang mga donasyon sama sa hygiene kits, school supplies, preloved clothes; mga tambal gikan sa City Health Office ug JR Borja General Hospital, lakip cash gikan sa mga nagkadaiyang buhatan sa city hall ug mga natigum nga cash gikan sa registration fee sa #ColorRun4Fun nga gipahigayun niadtong Septiyembre 3.
Nagtunol usab og tseke ngadto sa foundation gikan sa City Hall Employees Multi-Purpose Cooperative kon CHEMCO. Mismo si Fr. Ronnie Lapara, Executive Director sa Calabrian Children’s Foundation ang midawat sa mga donasyon.
Gawas sa pagdawat sa donasyon, mipasundayag usab sa ilang mga talento ang mga kabataan sa Calabrian Children’s Foundation atol sa outreach program.
Ang maong outreach program alayon sa kasaulogan sa 123rd Philippine Civil Service Anniversary. Kini gitambongan sa mga administrative officers sa nagkadaiyang buhatan sa LGU-CDO, Chief of staff Sheila Lumbatan, kinsa mirepresentar ni Mayor Klarex Uy, mga personahe sa HRMD nga gipangulohan ni HRMD OIC Xsyclyn Faith ‘Kansai’ Lumbatan ug uban pa.
News and photo courtesy of CIO CDO