Cagayan de Oro – APRUBADO na in principle sa House of Representatives ang HB no. 06790 nga giduso ni Cagayan de Oro 1st District Cong. Lordan Suan alang sa pagtukod og Polytechnic University of the Philippines kon PUP campus dinhi sa dakbayan sa Cagayan de Oro apan matud pa usa sa dakong problema mao ang yuta nga katikaran niini.
Sigon ni 1st District Assistant Director Bert Amplayo, siya nagkanayon nga anaa na sa technical working group sa Committee on Higher Education sa Kamara Baha ang nasangpit nga balaudnon diin sa kasamtangan padulong na kini sa second reading.
Aminado si Amplayo nga usa sa dakong hagit nga gi atubang karon ni Cong. Suan mao ang pag pangitag luna nga diin kong, sigon sa gilauman, kini dili ma hatag sa lokal na kagamhanan gumikan sa politikanhong konsiderasyon, adunay purohan nga kini mahinayon pa gihapon kong pananglitan adunay usa ka pribadong indibidwal nga andam mo donar sa yuta alang sa nasangpit nga proyekto aron kini ma patuman.
Dugang pa ni Amplayo, gusto gayud ni Cong. Suan nga matukod ang maong PUP Campus diha sa usa sa mga hinterland barangays sama pananglitan sa Dansolihon, asa mas daghan ang nagkinahanglan niini nga matang sa proyekto. Kini, isip libreng edukasyon hilabina niadtung walay ikasarang diha sa mga pribadong tulunghaan sa sentrong bahin sa syudad nga layo sa ilang pinuy-anan ug nag kinahanglan pa mo gasto alang sa plitehan ug abangan sa puy-anan kong padayong walay unibersidad nga matukod sa kabukiran alang sa kabus tang kaigsuonan.
News and photo courtesy of Cong. Suan Congressional Office