General Santos City – Ang Department of Science and Technology (DOST) sa Soccsksargen maoy mo-host sa 2024 “HANDA Pilipinas—Mindanao Leg,” ang kinadak-ang kalihokan sa teknolohiya ug kabag-ohan alang sa disaster risk reduction and management (DRRM).
Atol sa bag-o lang nga “Kapihan sa PIA 12” sa SM City General Santos, gipahibalo ni DOST Regional Director Sammy P. Malawan nga ang Soccsksargen region maoy mangulo sa kalihukan karong tuiga, nga gikatakda karong Oktubre 2-4, sa KCC Convention and Events Center dinhi.
Si DOST Secretary Renato U. Solidum Jr. ang mahimong keynote speaker ug resource person sa “Climate and Disaster Resilience in Mindanao” sa pagbukas sa adlaw sa kalihokan.
“Pinaagi sa Handa Pilipinas, bu-ot sa DOST nga isumpay ang kal-ang tali sa siyensiya ug sa komunidad, nga nagpakita nga ang siyensiya, teknolohiya, ug kabag-ohan dili lang para sa akademya o laboratoryo kondili adunay direktang epekto sa atong adlaw-adlaw nga kinabuhi,” matud ni Malawan.
Ang Handa Pilipinas, nga nagdala sa tema, “Innovate, Empower, and Collaborate: Building Disaster-Resilient Mindanao,” gilauman nga modani sa mga importanteng stakeholders, lakip ang mga lider sa lokal nga gobyerno ug mga opisyal sa DRRM gikan sa tibuok Mindanao. (Rem Agdon)