Zamboanga del Sur – Parehong Gipadayag ni Governor Victor J. Yu ug Deputy Speaker Cong. Divina Grace Yu ang suporta alang sa halal industry sa Zamboanga Peninsula, kini atol sa gipahigayong pinakaunang Halal Agri-Fishery Congress nga gipasiugdahan sa Department of Agriculture Regional Office-9.
Gitambongan ang maong kalihukan ni Usec. Zamzamin Ampatuan, DA-9 Regional Director Rad Donn Cedeno, myembro sa halal council sa rehiyon, Bangsamoro Consultative Council sa ZamboSur, DTI, NCMF, DOST, lakip na ang mga Muslim ug non-Muslim entrepreneurs sa lain-laing probinsya sa Zamboanga Peninsula ning milabay nga adlaw sa Gift Pavilion Convention Center.
Sumala ni Gov. Yu nga nalipay siya nga gihimo ang maong aktibidad mismo sa Pagadian City nga sentro sa Zamboanga del Sur. Dugang pa niya nga panahon na para mahatagan og pagtagad ang industriya sa halal isip kabahin sa pagpausbaw sa ekonomiya sa entero rehiyon, ingon nga siya ang chairman sa ZamPen Regional Development Council.
Si Deputy Speaker Yu mipadayag usab sa iyang suporta sa pinakaunang halal congress diin gisaad niini nga motabang sa pagpanday og balaod sa kaulohan nga mas mopalig-on sa maong industriya tungod sa pondo nga maangkon niini kung mahimo na kining hingpit nga balaod.
Dakong tabang alang sa halal industry sa nasud ang paghimo og capability-building activities ug pag-establisar sa gitawag og certifying bodies alang sa food safety ug halal standards, lakip na ang pagpahigayon og seminar aron makahatag impormasyon ug kahibalo sa mga Pilipino.
Ang maong mga lakang kabahin na sa mga inisyatiba nga giporma sa Department of Agriculture ingon nga regular agenda sa kagamhanan alang sa pagpalambo sa Halal industry.
(Source: Victory Zamboanga del Sur, photo courtesy of DA Region 9)