Davao del Norte – Luyo sa nasinating krisis tungod sa Covid19 pandemya, padayon gihapon ang pagpatuman sa mga minilyong proyekto sa lungsod, kagahapong adlawa December 22, 2020 Ubos sa liderato Mayor Arnel H. Sitoy uban sa Chief of Police sa lungsod sa San Isidro, PCPT. Marvin M. Estaciones, malampusong gipahitabo ang Ground Breaking Ceremony sa pagatukorung San Isidro Municipal Police Station nga nahimutang sa Purok Cacao B, Sawata, San Isidro, Davao del Norte.
Ang maong aktibidad gitambungan sa mga dagkong opisyales sa kwerpo sa kapulisan gikan sa Region XI nga gipangulohan ni PBGEN. Filmore Escobal , Regional Director, PRO X1, kauban si PCOL Ranie P. Hachuela, Provincial Director DNPPO, PCOL Efren E. Orlina, Chief, Regional Logistics and Research Development Division (R4), PCPT Philip Lawrence Abapo III, REU XI, Governor Edwin I. Jubahib nga girepresentahan ni Provincial Administrator Engr. Josie Jean R. Rabanoz.
Sa nahisgutang aktibidad anaa usab ang presensiya sa mga SB Members pinangulohan ni Bise-Mayor Baltazar L. Cuyos, IPMR Datu Antonio Araujo, ABC President Cirilo C. Lamsin ug Municipal Administrator Allan P. Delideli.
Ang nahisgutang gambalay gipundohan kini sa National Government, uban sa tumong nga matukuran ug Municipal Police Station ang matag lungsod sa katuyo-an nga mas mapataas pa ang moral sa kapulisan ug padayonong maserbisyohan ang katawhan sa lungsod sanglit kaning nga pasilidad adunay dakung kapuslanan alang sa tanang lumulupyo sa lungsod lakip na ang mga langyaw nga mobista dinhi.
Kini nga kapasiugdahan naghatag ug buhing paglaum nga hingpit ng makab-ot sa katawhan ang pangandoy nga madungagan ang mga estraktura og mga opisina sa lungsod sa pagsiguro nga mas mapalapdan pa ang pagserbisyo sa katawhan.
Ang kalampusan sa maong aktibidad nagpakita sa dakong determinasyon sa lungsod nga mo barog og makigbisog taliwala sa hulga sa Covid 19 pandemya.
(MIO San Isidro | OIC Michael Manguhig, RPN DXKT Davao)