Mapasalamaton karon si Governor Steve Chiongbian Solon tungod sa padayong pagtinabangay sa mga opisyales ug katawhan sa probinsya sa Sarangani.
Una, sa nahimong resulta sa gipahigayon nga Sabayang Patak Kontra Polio nga nahuman atong Agosto 2, kung diin ang Sarangani Province ug dakbayan sa Heneral Santos ang nakalampas og 100 percent coverage rate nga labing daghan ang nabakunahan nga mga bata sa tibuok Rehiyon Dose.
Nakakuha ang Sarangani og 102.43 percent coverage rate sa mao nga oral polio vaccination, gipangunahan sa Malapatan nga nakaabot og 107.14 percent, ikaduha ang Maasim 103.22 percent, ikatulo ang Glan 103.10 percent, Maitum 102.44 percent, Alabel 101.15 percent, Malungon 100.15 percent, ug Kiamba 100.01 percent. Nilampas ang tanang munisipyo sa Sarangani sa target sa Department of Health sa mabakunahan nga mga kabataan.
Pamatuod kini sa padayon nga pagsuporta sa katawhang Sarangan hilabi na sa mga ginikanan nga nisalig sa mga BHW ug taga-municipal health center kauban ang Sarangani Provincial Health Office, nga mabakunahan ang ilang mga anak aron malikayan ang maka-baldado nga sakit nga polyo.
Mapasalamaton usab si Governor Solon gumikan sa taas nga recovery rate sa mga nag-positibo sa Coronavirus puros mga LSI/locally stranded individual ug Returning OFW. Setentay-singko (75) porsyento nga recovery rate.
Sa bendisyon sa Buhing Dyos ug pagtinabangay sa mga residente pinaagi sa pagtuman sa mga safety ug quarantine protocol, gidayig ni Governor Solon ang pito (7) ka mayor, barangay-purok officials ug mga frontliner tungod anaa sa upat (4) ka munisipyo sa Sarangani Province ang wala nay natalang kaso sa COVID-19 hangtud ning tungura. COVID-free na balik ang lungsod sa Alabel, Glan, Kiamba ug Maitum.
Apan wala gihapoy pagkumpyansa tungod padayon pang gaabot ang mga LSI ug OFW. Segun sa Gobernador, tumanon lang ang quarantine protococol sulod sa katorse (14) ka adlaw. Walay makaduol nga pamilya aron masiguro nga walay matakdan ingkaso.
Dili mag-alanganin muduol ug mupabalo sa mga nabatyagan ug namatikdan tungod nakaandam matud pa nga mutabang ang LGU. Napamatud-an naman matud pa nga epektibo ang gibuhat sa mga medical frontliner sa Sarangani Province tungod singkwentay-kwatro (54) na kabuok mga taga-Sarangani ang naka-recover sa COVID-19 ug namauli na sa ilang mga pinuy-anan.
Gipabantay karon ang mga taga-Sarangani ug entiro Region 12 tungod sa gikataho nga local transmission sa probinsya sa Sultan Kudarat. Ang maestra nga saysentay-uno (61) ang edad taga-Isulan, Sultan Kudarat ang namatay kini sa Coronavirus. Padayon pang gina-diskubre kung asa kini nakuha sa maong maestra.
Sa report kagabii sa Department of Health Region 12, tulo (3) ka tao ang natakdan og COVID-19 sa Sultan Kudarat, samtang upat (4) ang natakdan sa Cotabato City. Wala pay labot dinhi ang report sa DOH 12 sa niagi nga adlaw nga Byernes.
Samtang, nagpadayon usab karon ang contact tracing sa Polomolok, South Cotabato ug Gensan tungod sa nag-positibo sa Coronavirus. Usa kini ka lalaki, saysentay-uno (61) gihapon ang pangidaron nga nakatrabaho isip gwardya sa Gensan.
Padayon ang panawagan ni Governor Solon kauban sila Senador Manny ug Congressman Ruel Pacquiao, Vice Governor Elmer De Peralta, tanang board member ug mga mayor sa Sarangani Province, nga walay mu-relax aron walay mahitabo nga community transmission. Gawas sa face mask, obligado napud musuot og face shield sa entiro Pilipinas.
(Source: Provincial Information Office-Sarangani Province)