Cebu City – Gipahibawo sa kadagkoan sa panglawas sa rehiyon 7 ang pagminos sa pagpanakod sa SARS-CoV-2, ang nakaingon sa coronavirus disease o covid 19.
Atol sa virtual press conference, si Dr. Mary Jean Loreche, tigpamaba sa Department of Health o DOH-7, miingon nga ang dagan sa pagkatap sa covid 19 sa rehiyon mius-os ngadto sa 0.77 percent sa milabayng pito ka adlaw.
Sumala pa ni Loreche, basi sa nationwide statistics, ang seven-day growth sa virus wala na makaabot og one percent.
Ang COVID-19 usa ka sakit nga naggumikan sa SARS-CoV-2, usa ka variant sa SARS-CoV nga SARS o Severe Acute Respiratory Syndrome nga mikatap sa tunga-tungang bahin niadtong 2002 ug 2003.
Matod ni Loreche, nunot sa pagdailos sa transmission rate mohinay usab ang gitawag og case-doubling time sa Central Visayas ngadto sa 90 ka adlaw o tulo ka buwan.
Hangtod niadtong Domingo, ang case bulletin sa DOH 7 nagbutyag nga ang rehiyon aduna nay 17,262 ka kaso sa COVID-19.
Sa maong gidaghanon, 11,660 ang naulian samtang 1,005 ang namatay sa impeksyon.
Nagpasabot kini nga aduna na lay 4,597 ka aktibong kaso ang gi-monitor sa mga tinugyanan sa panglawas. (Jhon Tadlip/ JTY)
(Source: Department of Health VII)