Napa-ambit sa gobernador sa probinsya sa Sarangani ang sekreto sa kalampusan sa pagpanginabuhi ug sa pagpangalagad. Sa iyang mensahe atol sa ika-28 ka tuig nga foundation anniversary ug ika-18 nga MunaTo Festival virtual celebration sa probinsya sa Sarangani, nalakbitan ni Governor Steve Chiongbian Solon ang mga pulong sa Diyos, partikularmente sa Salmo 127: 1-2. Sa maong teksto sa Bibliya giingon: kawang ug walay kapuslanan ang pagtukod og balay bisan ang pagtukaw sa gwardya, ang pagmata og sayo, pagbilar sa gabii, ug ang paghago sa matag adlaw aron lang makakaon, kung wala ang tabang ug proteksyon gikan sa Ginoo.
Pwede rang maguba ang gitukod nga balay ug masudlan sa kaaway ang usa ka lugar bisan anaa pay bantay kung ang tibuok dapit ang wala panalipdi sa Kahitas-an. Kulangon sa kanunay ang pagpanginabuhi kung walay Ginoo sa taliwala. Himuon dapat matud pa nga sentro sa kinabuhi ug sa pagpangalagad ang Buhing Diyos.
Sa selebrasyon sa founding anniversary sa Sarangani Province, nihatag usab og mga mensahe via virtual sila Senador Manny ug Congressman Ruel Pacquiao, Vice Governor Elmer De Peralta ug ang tanang mayor sa pagsuporta sa mga board member. Lakip gipasalamatan ni Governor Solon ang mga national government agency nga padayong nagbubo og pondo ug mga kaayuhan ilalum sa Sulong Sarangani flagship program katugbang ang magsuong Pacquiao.