Gibisita ni Governor Steve Chiongbian Solon kagahapong adlawa, adlaw nga Martes, ang munisipyo sa Maasim aron personal kumustahon ang sitwasyon human nga gipailalum ni Mayor Zyrex Pacquiao sa ECQ kon Enhanced Community Quarantine ang usa ka purok, ang Purok 4-B Colon, samtang naghulat sa resulta sa swab test sa tanang indibidwal nga nakaduol sa naigo sa Coronavirus.
Kung may nahunusan og hinulamang kinabuhi usa ka saysentay-dos (62) ang edad taga-Bula, Gensan gumikan matud pa sa COVID-19 nga gapailalum ng daan og dialysis tungod sa naunang balatian sa kidney, usa ka helper singkwentay syete (57) ang pangidaron, babae, taga-Maasim ang nahunusan pud og kinabuhi tungod gihapon matud pa sa Coronavirus.
Dili LSI o locally stranded individual ug Returning OFW ang taga-Purok 4B, Maasim apan ang iyang mga amo ug mga kaatubang sa balay ang gaadtuan sa Gensan Fishport isip ilang negosyo. Una kining gikaingon nga naigo og dengue tungod nigamay ang iyang platelets.
Una namang gikataho nga daghan ang nag-positibo sa Coronavirus sa dakbayan sa Heneral Santos nga ang exposure anaa mismo sulod sa Gensan Fishport, apil na ang usa ka kumprador nga taga-Surallah, South Cotabato. Hinungdan nga temporaryong gisaraduan ang dakong bahin sa Gensan Fishport sugod karong adlawa, Setyembre 2. Gani, gideklara na ni Mayor Ronnel Rivera nga aduna gayuy local transmission sa Gensan.
Sa panagtigum kagahapon, gihisgutan ang mga lakang aron palig-unon pa ang mga palisiya ug contingency plan tungod dili malimod nga daghang taga-MaKiMa kon Maasim, Kiamba ug Maitum ang anaa halos taga-adlaw sa Gensan Fishport. Suportado usab kini nga lakang nila Senador Manny ug Congressman Ruel Pacquiao, Vice Governor Elmer De Peralta ug tanang board member.
Giklaro pud ang bahin sa Maasim Municipal Hospital. Gi-lockdown ang Maasim Municipal Hospital hangtud ning panahuna panigurado lamang tungod na-admit ang maong ginang una gidala sa Gensan. Walay usay admission, apan baynte-kwatro (24) oras abri ang Maasim Municipal Hospital alang sa mga outpatient services. Mudawat usab kini og emergency services kadtong emerhensya ang sitwasyon.
Anaa sa meeting kagahapon sila Mayor Pacquiao, Vice Mayor Tessie Nambatac, Maasim Municipal Health Officer Doctora Jhonnace Arriane Magan ug DOH Sarangani-Gensan Provincial Officer Doctor Buth Dulduco, lakip na sila Kiamba Mayor Bogi Martinez, Maitum Mayor Bryan Reganit ug mga kadagkuan sa Maasim Police Station ug 37th IB Philippine Army.
Sa bahin sa taga-probinsya, giubanan si Governor Solon nila Assistant Provincial Administrator Engineer Gerald Faciol, Provincial Health Officer Doctor Arvin Alejandro, Assistant Health Officer Doctor Gabriel Fernandez, PNP Sarangani Provincial Director Col. Michael Lebanan ug ang provincial contact tracing team gipangunahan ni PSG/Provincial Security Group Chief Retired Police Col. Jaime Tabucon kauban si Retired Police Col. Felix Gabayeron.
Nakasuot mismo og PPE poncho suit sila Governor Solon, PPE poncho suit susama og raincoat inubanan sa face mask ug face shield, isip panagana ug mapakita nga seryoso ang mga opisyales ug dili angay magkumpyansa aron dili mahitabo ang kamatay ug local transmission kon pagtakdanay nga dili na mahibal-an kung asa gikan ug nganong natakdan.(LGU Sarangani News)