Naipatungpal ti arapaap ti probinsia a maaddaan ti bukud a pasdek ti Ilocos Norte Agriculture and Fisheries Extension System babaen iti panangyendorsar ken panangaprobar ni Gobernado Matthew Marcos Manotoc.
Daytoy ti impannakel ni Provincial Agriculturist Mrs. Norma Lagmay iti pannakaisayangkat ti “groundbreaking” iti nasao a proyekto.
Inbunannagna a ti nasao a pasdek ket maawagan ti Ilocos Norte Agriculture and Fisheries Extension Center.
Imbatadna a dayoty ti agbalin a sentro dagiti amin nga extension ken aktibidad iti Community Management.
Segun iti Provincial Agriculturist, amin nga ahensia nga agop-operar iti babaen ti agrikultura ken iti “fisheries” ti mangbukel iti INAFES.
Inlawlawagna a dayoty ti agbalin a network, System ken procedure iti pannakaipaay ti naan-anay a pannarabay kadagiti mannalon ken mangngalap.
Impalgakna a ti Ilocos Norte ti “pilot province” iti intero a pagilian iti pannakaipatungpal ti Agriculture and Fisheries Extension System.
Maipalagip a nagpinnirma da Agriculture Sec. William Dar ken Gob. Matthew Marcos Manotoc iti Memorandum of Agreement itay kallabes para iti pannakaipatungpal ti INAFES.
(Rosita Macalipis, RPN DZRL Batac – Correspondent)
(Source: Provincial Government of Ilocos Norte)
