Adda manen iti napasangpet ti probinsia a bakuna a pangkontra iti COVID-19 babaen ti panangkiddaw ni Gob. Matthew J. Marcos Manotoc.
Daytoy ti napintas a damag nga impakaamo ni Public Health Consultant Dr. Rogelio Balbag kabayatan iti naisayangkat a press briefing a nagatendaran ni Gob. Marcos Manotoc, pakairamanan ni Covid Health Consultant Dr. Norman Rabago kenn Major Roxane Parado,
mangidadaulo iti Ilocos Norte Contact Tracing Team.
Segun kenni Dr. Balbag 3,000 a vials ti napasangpet da itay napan a Marso 30 iti daytoy a tawen.
Kunana a nairanta dagiti nasao a bakuna kadagiti health workers a saan pay a nabakunaan.
Dagitoy ket kadagiti Rural Health Unit kadagiti nagduduma nga ili ditoy probinsia.
Kuna pay ni Dr. Balbag a daytoy ket kas naisaguday iti listaan a maikadua a maipangpangruna a mabakunaan iti anti covid 19.
Maisayangkat manen ti panagbakuna kadagiti sumarsaruno nga aldaw kalpasan a nakumpleto metten dagiti dadduma a health workers ken medical doctors iti maikadua a doses da iti anti-COVID-19.
(Rosita Macalipis, RPN DZRL Batac Correspondent)
(Source: Provincial Government of Ilocos Norte)