Mibahad si Gob. Gwendolyn Garcia sa pagpasakag kasong libel batok usa ka reporter sa usa ka national news website nga nagbasi sa Sugbo tungod sa gi-post niini sa Facebook nga nangutana kaniya kon wala ba siya angu-angoha?
Si Garcia, nga miatubang sa mga malapason sa ECQ kun enhanced community quarantine sa Talisay City, mipakita sa screenshots sa post ni Rhea Ruth Rosell.
Si Rosell, nga Cebu correspondent sa usa ka national newspaper ug online news website, nag-post niadtong Sabado sa FB nga misukna kang Garcia kon wala ba siya makasinati sa maong kahimtang panahon sa iyang regular press conference.
Ang 64 anyos nga gobernador halos matag adlaw nga nakig-atubang sa mga tigbalita sukad sugdi pagpatuman ang ECQ niadtong Marso 30.
Nagkanayon si Rosell si iyang post sa FB nga usahay makasukot siya nga sa pagpunay og yawyaw ni Garcia sa presscon, wa ba kaha kini angu-angoha?
Wala makauyon si Garcia sa post sa reporter busa iya kining ikeha og libel.
Gisuwayan pagkontak sa mga sakop sa media si Rosell aron kuhaan unta og reaksyon apan mibalibad kay matod pa, di una siya moluwat og bisan unsang statement.
