Human nanghatag og libre nga mga wi-fi modem kon PLDT Wi-Fi Home Unit ang Smart Communications, usa sa dako nga telecommunication company sa Pilipinas ug dugay ng partner sa Provincial Government sa Sarangani, ngadto sa mga estudyante sa Sarangani Province partikularminte ang mga estudyante sa kolehiyo aron magamit sa online learning, laing dako nga telco na usab nga dugay ng partner gihapon sa Sulong Sarangani flagship program ang padayon nga nagpadangat sa ilang pag-ayuda.
Hilabihan ang kalipay sa mga ginikanan ug sa setentay-singko (75) ka mga kabataang Sarangan nga maoy mulangkob sa unang batch nga mu-eskwela sa SaNSA kon Sarangani National Sports Academy magsugod karon ng Agosto 24, tungod nihatag og donasyon ang Globe Telecom alang sa mahitabo nga online ug offline learning education sa student-athletes.
Mismong si Mr. Eric Bergavera, security manager sa Globe-Mindanao, ang nitunol sa otsyenta (80) kabuok Samsung cell phone nikantidad og seven hundred sixty thousand pesos (₱ 760K), mga sim card nibalor og kwarenta mil ka pesos (₱ 40K), ug prepaid card nga magsilbi nga binulan nga load balor og six hundred forty thousand pesos (₱ 640K).
Suma total, nikabat sa ₱ 1.4 Milyon ka pesos ang donasyon sa Globe Telecom para sa sports academy sa Sarangani Province nga mao ang SaNSA, ang gikonsidera nga labing una nga sports academy sa Pilipinas gidulamahan sa LGU ug DepEd sa dakong pagsuporta sa Philippine Sports Commission. Sa SaNSA, mu-eskwela ang student-athlete gikan sa iyang Grade 7 first year high school paingon na sa Grade 12 senior high school. Pabor sa mga buot mahimong varsity player pagtungtong sa kolehiyo.
Nahitabo ang seremonyas niagi lang adlaw sulod sa Sarangani Capitol Gymnasium atol sa natigayon nga Parents Orientation cum Ceremonial Turnover of Digital Learning Device. Gidawat ni Governor Steve Chiongbian Solon ang maong mga gadgets, kauban sila Alabel Mayor Vic Paul Salarda, Board Member Tata Galzote, DepEd Sarangani Curriculum Implementation Division Chief Donna Panes ug Regional Supervisor Arturo Tingson, ang representante ni DepEd 12 Regional Director Allan Farnazo, kuyog usab ang mga personahe sa Sulong Atleta program ni Governor Solon, sa pagsuporta nila Vice Governor Elmer De Peralta ug mga board member.
Sa pakighinabi sa istasyon sa radyo nila Provincial Sports Adviser Paul Allen Villamora ug SaNSA Coordinator Principal Rochel Bantulo-Morido, wala nay rason matud pa nga dili makaapil sa klase ang mga student-athlete sa SaNSA sa blended learning tungod usa (1) ka tuig na silang tagaan og libre nga binulan nga cell phone load gikan sa Globe Telecom samtang wala pay face-to-face nga pagtuon.
Paspas matud pa nga naka-access ang pamunuan ni Governor Solon sa management sa Globe. Sa pakig-alayon ni Jonathan Joson, ang investment promotion adviser ni Governor Solon, nagpadangat dayon sa ilang ₱ 1.4 Milyon ka pesos nga kantidad sa donasyon ang mga kadagkuan sa Globe Telecom didto pa gikan sa kauluhang Maynila.
Ang pagpabarog sa sports academy ang gi-konsepto ni Governor Solon aron maalalayan og sakto ang mga atletang Sarangan. Sa hugot nga pagsuporta nila Senador Manny ug Congressman Ruel Pacquiao, napirmahan ni Pangulong Rodrigo Duterte ang Republic Act No. 11224 nga nag-establisar sa Sarangani Sports Training Center sulod sa compound sa Kapitolyo sa Sarangani.
Usa sa adviser-trainer ni Governor Solon sa SaNSA mao mismo si Henry Dagmil, ang ilado nga Pinoy multi-titled long jumper ug runner, gold medalist sa SEA/Southeast Asian Games ug usa pud ka Olympian nakaapil sa Olympic Games lakip na sa Asian Games ug sa World Championships in Athletics.
(Sarangani PIO)