Mahimo na nga maka-biyahe ngadto sa gawas sa nasud ang conroversial nga mayor sa lungsod sa Daanbantayan, Cebu nga si Vicente Loot. Si Loot nalakip sa giingong lima ka narco-generals base sa gibutyag ni Presidente Rodrigo Duterte.
Giangkon ni Gobernador Hilario “Junjun” Davide III nga iyang gi-aprobahan ang Authority to travel ni Loot kinsa nagtinguha pagbiyahe ngadto sa Canada ug USA. Pinaagi sa iyang suwat pinitsahan niadtong Nobyembre 5, 2018 gipadayag ni Loot ngadto sa gobernador ang iyang tinguha nga mobakasyon ug usab moduaw sa iyang masakiton nga igsuong babaye sa Maryland, USA ug motambong usab sa birthday celebration sa lain niyang igsuong babaye sa Canada.
Ubos sa DILG protocol, ang mga Local Chief Executives gikinahanglang mangayo og permiso gikan sa gobernador alang sa 30 ka adlaw nga vacation leave ug pagbiyahe sa abroad.
Gipasabot ni Gobernador Davide nga wala siya’y nakita nga legal impediment aron nga dili aprobahan ang Authority to travel ni Loot. Matud usab sa gobernador wala siya’y nahibaw-an nga bisan unsa nga kaso nga gipasaka batok sa mayor.
Samtang, gitataw sa pangulo sa Cebu Provincial Police Office (CPPO) Senior Supt. Manuel Abrugena nga dili makapakgang ang kapolisan sa plano ni Loot nga mobiyahe ngadto sa gawas sa nasud. Matud ni Abrugena, walay giluwatan nga Hold Departure Order ang Department of Justice (DOJ) batok kang Loot busa dili kini mahimong pugngan sa pagbiyahe ngadto sa abroad.
Nasayran nga wala na mo-report sa iyang buhatan sa municipal hall sa Daanbantayan ang mayor gumikan sa mga hulga sa iyang kinabuhi. Bisan sa mga meetings sa tanang Local Disaster Risk Reduction and Management Office (LDRRMO) agi og pangandam sa nakalabay’ng bagyong Samuel wala usab motambong si Loot.
Kahinumduman nga naangol ang usa ka yaya sa mga apo ni Loot ingon man ang driver sa dihang gibanhigan ang mayor uban sa iyang pamilya didto sa pantalan sa lungsod sa Daanbantayan, usa ka adlaw sa wala pa ang barangay election.
